Die Godsbeskouing van die teologie van die revolusie in samehang met die onderhawige vryheidsideologie
Loading...
Date
1981-01
Authors
Heystek, Michiel Christiaan
Journal Title
Journal ISSN
Volume Title
Publisher
University of the Free State
Abstract
Afrikaans: Die teologie van die revolusie het sy ontstaan onder andere te
danke aan die swak ekonomiese, maatskaplike en politieke toestande
in die Derde Wêreld. Die term teologie van die revolusie is die
eerste keer op die Konferensie vir Kerk en Maatskappy van die
Wêreldraad van Kerke in Genêve (1966) gebruik. Daar is gepleit
vir n veranderde houding in die teologie teenoor revolusie as 'n
middel om veranderinge teweeg te bring.
Die oorspronklike betekenis van revolusie het in verband gestaan
met die omwenteling van die sterre. Teen die einde van die Middeleeue
het dit n politieke betekenis gekry. Die Franse Revolusie
word as die eerste groot revolusie beskou en is ook die model vir
latere revolusies. Die Russiese Revolusie van 1917 het n belangrike
verandering ten opsigte van revolusies aangebring.
Geweld het deel geword van die revolusies, wat nie altyd spontaan
ontstaan nie, maar dikwels kunsmatig beplan word met in agneming
van maatskaplike en politieke toestande. Die verskoning vir geweld
is dat bestaande strukture as geweldadig beskou is en daarom mag
dit op 'n geweldadige wyse verander word.
Die teologie van revolusie wil 'n teologie wees, daarom hou hy hom
met uitsprake oor God en Christus besig, maar in sy uitsprake is
hy nie Skrifgebonde nie. Hy steur hom ook nie aan die grense wat
daar normaalweg aan 'n Skrifgebonde teologie gestel word nie. Hy
wil 'n teologie vir sy tyd wees, deur 'n boodskap vir die mens in die
hede te bring. Dit verkrag ongelukkig die wese van die evangelie
deurdat dit nie die Woord van God suiwer laat spreek nie.
In die teologie van die revolusie is daar 'n sterk religieushumanistiese
grondmotief. Die religie is die geestesgesteldheid
wat op die hart van die mens beslag lê as die diepste wese van die
mens. Dit is ook die band wat hom met God verbind. Deur die sondeval
is die band met God verbreek.
Die humanistiese trek kom na vore wanneer die mens homself verhef
om soos God te wees. Dit gebeur alreeds by die sondeval, waar die
mens aan God ongehoorsaam is. Die humanisme het vanaf die
Renaissance en Verligting geweldig veld gewen. Die moderne
humanisme het uitlopers gehad soos onder andere rasionalisme,
positivisme, liberalisme, materialisme ensovoorts wat almal revolusionêr
van aard is, aangesien dit teen God as heerser oor hierdie
wêreld in opstand kom. In die twintigste eeu kom daar reaksie in
die vorm van irrasionalisme. Die humanisme bereik sy hoogtepunt
in die outonomie van die eksessiewe liberalisme en sekularisme wat
God geheel en al uitsluit en die mens as norm neem.
Die Godsbeskouing van die teologie van die revolusie is nie Skrifgebonde
nie. Dit stel God as onvoltooid voor, wat deur Sy handeling
in die geskiedenis tot voltooiing kom. God is ook 'n dinamieshandelende
God wat tot bevryding van die mens optree. Die mens
werk hierin saam deur sy deelname aan die revolusie, waar God dan
ook ontmoet word. Dit ken geen persoonlike ontmoeting met God nie.
God is ook die politieke Bevryder wat die mens van onderdrukking
en verslawing bevry soos in die Exodus-gebeure plaasgevind het.
Jesus word as revolusionêr beskou. Hy sou teenoor die Romeinse
oorheersing in opstand gekom het en sou aan die revolusionêre
beweging van die Selote deelgeneem het. Sy kruisiging word ook
as 'n revolusionêre daad beskryf. Jesus word ook as die partyganger
van die armes voorgehou.
Die koninkryk van God word as 'n politieke en revolusionêre begrip
verklaar, waarin Jesus as politieke Middelaar optree.
Ook die Heilige Gees word in hierdie politieke teologie ingeskakel.
Die Gees is die dinamiese teenwoordigheid van God in die wêreld -
waarin die vrywording herkenbaar is.
Die politieke Messianisme verteenwoordig ook die sterk vryheidsideologie
van die teologie van die revolusie. Daar is egter in
hierdie teologie 'n verabsolutering van vryheid.
Description
Keywords
Liberation theology, Freedom (Theology), Dissertation (M.A. (Biblical Science))--University of the Free State, 1981